ஜாக்குக்கு பகிரங்க அறைகூவல்

ஜாக்குக்கு பகிரங்க அறைகூவல்

மரியாதைக்குரிய ஜம்இய்யத்து அஹ்லில் குர்ஆன் வல் ஹதீஸ் இயக்கத்தின் தலைவருக்கும், உலமாக்களுக்கும் பீ.ஜைனுல் ஆபிதீன் எழுதிக் கொள்வது அஸ்ஸலாமு அலைக்கும்.

சமீப காலமாக உங்கள் இயக்கம் மூலம் நடத்தப்படும் நிகழ்ச்சிகளில் ஜைனுல் ஆபிதீனாகிய நான் எனது கொள்கையில் இருந்து விலகி விடுமாறு அழைப்பு விட்டு வருவது என் கவனத்துக்குக் கொண்டு வரப்பட்டுள்ளது.

நீங்கள் நேர்வழி என்று நினைக்கும் பாதைக்கு மற்றவர்களை அழைக்க உங்களுக்கு உரிமை உள்ளது.

நமக்கிடையே நீண்ட நெடுங்காலமாக அடிப்படைக் கொள்கைகளில் கருத்து வேறுபாடு இருந்து வருவது முஸ்லிம் சமுதாயம் அறிந்து வைத்துள்ள உண்மையாகும்.

இரு வேறு கருத்துக் கொண்டவர்களில் ஒரு தரப்பினர் மற்ற தரப்பினரை தமது வழியின் பால் எப்போது அழைக்கலாம்? இரு தரப்பும் கருத்து வேறுபாடுள்ள விஷயங்களைக் குறித்து விவாதம் செய்து ஒரு தரப்பின் கருத்து தான் சரியானது என்பது தெளிவானால் தான் வென்ற தரப்பு தோற்ற தரப்பை தனது கொள்கையின் பால் அழைக்க நியாயம் உள்ளது.

அப்படி எதுவும் நிகழவில்லை. நான் நீண்ட காலமாக விவாதிக்க அழைப்பு விட்டும் அதை ஏற்க மறுக்கும் நீங்கள் என்னை உங்கள் வழிகெட்ட கொள்கையின் பால் அழைப்பது வேடிக்கையாக உள்ளது.

எனவே நேர்வழியில் இருக்கின்ற நான் தான் உங்களைச் சரியான வழியின்பால் அழைக்க நியாயம் உண்டு என்பதை முதலில் சொல்லிக் கொள்கிறேன்.

உங்களிடம் நான் வேறுபடும் கொள்கைகளில் நான் நேர்வழியில் இருப்பதாக நன்கு ஆராய்ந்து உறுதியான முடிவில் இருக்கிறேன்.

வஹீ மட்டும் தான் இஸ்லாத்தின் மூல ஆதாரம். நபித்தோழர்கள் உள்ளிட்ட எவரது கருத்தும், செயலும் மார்க்க ஆதாரமாகாது என்பது எனது கொள்கை.

நபித்தோழர்கள் இந்த உம்மத்தில் சிறந்தவர்கள் என்பதில் நானும், நீங்களும் ஒத்த கருத்தில் இருந்தாலும் நபித்தோழர்களும் பாவத்துக்கு அப்பாற்பட்டவர்கள் அல்லர். இஸ்லாத்தை ஏற்ற பின்பும் அவர்களிடம் பாவங்கள் நிகழ்ந்துள்ளன. அதில் சிலர் நீடித்தும் உள்ளனர். மார்க்கம் என்று கருதி மார்க்கத்தில் இல்லாததை உருவாக்கியவர்களும் நபித்தோழர்களில் இருந்துள்ளனர். இதைக் கூறுவது அவர்களை அவமதிப்பதாக ஆகாது என்று நான் கருதுகிறேன். இதில் நீங்கள் மாறுபடுகிறீர்கள்.

சூனியத்துக்கு எந்தத் தாக்கமும் இல்லை என்றும், அதை நம்புவது அல்லாஹ்வுக்கு இணை கற்பிப்பதாகவும் ஆகும் என்றும் நான் கூறுவதில் நீங்கள் மாறுபடுகிறீர்கள்.

அறிவிப்பாளர் தொடர் சரியானது என்று கருதப்படும் ஹதீஸ்கள் திருக்குர்ஆன் கூறும் அறிவுக்கு முரணில்லா விட்டால் அவற்றை ஏற்றுச் செயல்பட வேண்டும்; திருக்குர்ஆன் கூறும் அறிவுக்கு முரணாக அமைந்த ஹதீஸ்களின் அறிவிப்பாளர் தொடர் சரியானதாகக் கருதப்பட்டாலும் அவை ஹதீஸ்கள் அல்ல என்று நான் கூறுவதில் நீங்கள் முரண்படுகிறீர்கள்.

மேலும் திருக்குர்ஆன் விளக்கத்தில் நான் தவறான நச்சுக்கருத்துக்களைப் புகுத்தி உள்ளதாக பகிரங்கமாக கூறி அழைப்பு விட்டுள்ளீர்கள்.  அவை என்ன என்பதையும் பட்டியலிட்டு அவை குறித்தும் விவாதம் நடத்தப்பட வேண்டும்.

இவை குறித்து நாம் ஒத்த கருத்துக்கு வந்து விட்டால் நாம் ஒத்த கொள்கையில் பயணிக்கலாம்.

எனவே நான் குறிப்பிட்ட இந்த விஷயங்களில் நீங்கள் வழிகேட்டில் இருப்பதாக நான் உறுதியாக நம்புகிறேன்.

இது குறித்து கன்னியமான முறையில் நட்பு அடிப்படையிலான விவாதத்துக்கு அழைப்பு விடுக்கிறேன்.

அந்த விவாதத்தில் நீங்கள் கொண்ட கொள்கை தான் சரியானது என்று நிரூபித்தால் அதை ஏற்று பகிரங்கமாக அறிவிக்க நான் தயாராக உள்ளேன். நீங்கள் கொண்ட கொள்கை தவறானது என்று நான் நிரூபித்தால் நீங்கள் உங்கள் நிலையை மாற்றிக் கொள்ளுங்கள்.

அப்படி நிகழ்ந்தால் ஒரே கொள்கையில் நாம் பயணிக்கும் நிலை ஏற்படும்.

பொது மேடைகளில் நீங்கள் விடுக்கும் அழைப்புக்கு எனது பதில் இதுதான்.

இதற்கான பதிலை எதிர்வரும் நவம்பர் 30 ஆம் தேதிக்குள் எதிர்பார்க்கிறேன்.

விவாதம் நடத்த ஒப்புக் கொண்டு நீங்கள் பதில் தந்த பின் நம் இரு தரப்புக்கும் வசதியான ஒரு நாளில் விவாதம் செய்வதற்கான ஒழுங்குகள், விதிகள்,  விவாதம்  நடக்கும் காலம் ஆகியவற்றைப் பேசி முடிவு செய்து கொள்ளலாம்.

அன்புடன்

பீ.ஜைனுல் ஆபிதீன்

குறிப்பு: சென்னை மண்ணடியில் அன்பான அழைப்பு விடுக்கும் மேடையில் உங்களிடமிருந்து வெளிப்பட்ட கர்வத்தையும், ஆணவத்தையும் நான் அலட்சியம் செய்கிறேன்.

பெரிய மேடையில் பேசிய பீஜே இன்று அறைக்குள் லைவ் போடுவது பரிதாபமாக உள்ளது என்று குறிப்பிட்டுள்ளீர்கள். இயக்க பலம் இல்லாமல் போய்விட்டான் என்பதால் தான் நீங்கள் எனக்கு அழைப்பு விடுகிறீர்கள் என்றால் இதை விட அறிவீனம் எதுவுமில்லை.

எனக்கு இயக்க பலம் இல்லை என்பது தான் இந்த அழைப்புக்குக் காரணம் என்று கருதும் அளவுக்கு உங்கள் நிலை அமைந்துள்ளதை எண்ணி பரிதாபப்படுகிறேன்.

நான் தனி ஒருவனாக இருந்தாலும் கொள்கையை எடை போட அது அளவு கோல் அல்ல என்பதை முதலில் உணருங்கள்.

ஆனால் அது கூட உண்மை இல்லை. நீங்கள் பெரிய முயற்சி எடுத்து தலை நகரில் கூட்டிய கூட்டத்தை விட அதிகமான மக்கள் முன்னிலையில் அதிராம்பட்டிணத்தில் பொது நிகழ்வில் நான் சில நாட்களுக்கு முன்னர் தான் உரையாற்றியுள்ளேன். உங்கள் இந்தப் பரிதாபம் முற்றிலும் தவறானது என்று தெரிவித்துக் கொள்கிறேன்.

நான் மட்டுமே தனித்து விடப்பட்டாலும் கொள்கை தவறு என்பதை உரிய முறையில் நிரூபித்தால் மட்டுமே நான் மாற்றிக் கொள்வேன்.

பீஜே என்று மக்கள் அழைத்த போது நான் சரியாக இருந்ததாகவும் அண்ணன் என்று அழைக்கப்பட்ட பின் நான் மாறிவிட்டதாகவும் நீங்கள் பொதுமேடையில் பேசியதைக் காணும் போது இந்த அளவுக்கு உங்கள் சிந்தனை வரண்டு விட்டதா என்று நான் பரிதாபப்படுகிறேன்.

ஒவ்வொரு முஸ்லிமும் சகோதரன் என்ற குர்ஆன் வசனத்தையே நீங்கள் மறுப்பதாக இது அமைந்துள்ளது. என்னை விட குறைந்த வயதுள்ளவர்கள் அண்ணன் என்று என்னை அழைப்பது மார்க்கத்தில் தவறா?

மவ்லானா மவ்லவி பட்டம் போட்டு நீங்கள் ஒருவருக்கொருவர் அழைத்துக் கொள்கிறீர்களே அது போன்ற மமதை அண்ணன் என்று அழைப்பதில் இல்லை.

உங்களைத் தமிழகத்துக்கு அறிமுகம் செய்த கமாலுத்தீன் மதனி அவர்கள் எப்படி அறிமுகம் செய்தார்களோ அந்த நிலைக்கு மாறி எங்களுடன் சேருங்கள் என்றும் ஆணவமாக பொது மேடையில் பேசி தரம் தாழ்ந்துள்ளீர்கள்.

நாகர்கோவிலில் முடங்கிக் கிடந்த கமாலுத்தீன் மதனியை நாடு முழுவதும் நான் தான் அறிமுகம் செய்தேன். அவருக்கு முன்னர் நான் தான் அஹ்லுல் குர்ஆன் ஹதீஸ் இயக்கத் தலைவனாக இருந்தேன்; நான் அடியோடு மறுத்து கமாலுத்தீன் மதனியைத் தலைவராக்கினேன் என்று உங்களைப் போல் நான் சொன்னால் அது உண்மையாக இருந்தாலும் நாகரிகமுள்ள மக்கள் கர்வமாகத் தான் அதைக் கருதுவார்கள்.

இது போல் கீழ்த்தரமான விமர்சனங்கள் வேண்டாம். நாம் கண்ணியமான முறையில் விவாதம் செய்வோம். எது நேர்வழி என்பதும் யார் திருந்த வேண்டும் என்பதும் அப்போது முடிவாகும். இன்ஷா அல்லாஹ்

“பி.ஜைனுல் ஆபிதீன்”