ஊனமுற்றவர் என்று போலி சான்றிதழ் வாங்கி அரசை ஏமாற்றலாமா?
இங்கே பிரான்சில் வேலை இல்லாதவர்களுக்கு வாழ்வாதார உதவி மாத மாதம் வழங்கப்படும். நம் முஸ்லீம் தமிழ் மக்கள் தங்கள் உடல் நல்ல விதமாக இருந்தாலும் டாக்டரிடம் பணம் கொடுத்து ஊனமுற்றவர்கள் சான்றிதழ் வாங்கிக்கொண்டு அரசாங்க பணம் வாங்கி கொண்டுஇருக்கிறார்கள். மேலும் அவர்களே அரசாங்கத்துக்கு கணக்கு காட்டாமல் வேலையும் செய்து வருகிறார்கள்.
கேட்டால் மனிதன் தங்கள் ஏமாற்ற வில்லை, கிருஸ்துவ அரசாங்கத்தை தான் பலி வாங்குவதாக வியாக்கியானம் கூறுகிறார்கள்.
ஹதீஸ் பார்வையில் இவர்கள் செய்வது நல்லதா கெட்டதா ?
ஷாபி சித்திக் பிரான்ஸ்
பதில்
அரசுக்கு கணக்கு காட்டாமல் வரி ஏய்ப்பு செய்யலாமா என்பதற்கு கீழ்க்கண்ட லின்கில் பதில் உள்ளது.
ஊனமில்லாமல் இருந்தும் ஊனமுற்றவர் என சான்றிதழ் பெற்று அதன் மூலம் சலுகைகள் பெறுவதை மார்க்கம் அனுமதிக்கவில்லை.
பிரான்சில் வேலைக்காக குடியேறியவர்கள் ஒரு ஒப்பந்தத்தின் அடிப்படையில் தான் குடியேறுகிறார்கள்.
நாங்கள் இந்த நாட்டுக்கு விசுவாசமாகவும், இங்குள்ள சட்டங்களுக்கு கட்டுப்பட்டும் நடப்போம் என்ற உறுதி மொழியின் அடிப்படையில் தான் பிரான்சில் குடியேறுகிறார்கள்.
அப்படி குடியேறிய பின் ஊனமில்லாமல் இருந்து ஊனமுற்றவர் என சான்றிதழ் பெற்று அரசை ஏமாற்றுவது அந்த ஒப்பந்தத்தை மீறுவதாகும்.
ஒப்பந்தங்களை நிறைவேற்றுவது குறித்து அல்லாஹ் பல வசனங்களில் வலியுறுத்துகிறான்.
177. உங்கள் முகங்களை கிழக்கு நோக்கியோ, மேற்கு நோக்கியோ திருப்புவது நன்மையன்று. மாறாக அல்லாஹ்வையும், இறுதி நாளையும், வானவர்களையும், வேதங்களையும், நபிமார்களையும் நம்புவோரும் உறவினர்களுக்கும், அனாதைகளுக்கும், ஏழைகளுக்கும், நாடோடிகளுக்கும், யாசிப்போருக்கும், அடிமைகளை விடுதலை செய்வதற்கும் (மன) விருப்பத்துடன் செல்வத்தை வழங்குவோரும், தொழுகையை நிலைநாட்டுவோரும், ஜகாத்தை வழங்குவோரும், வாக்களித்தால் தமது வாக்கை நிறைவேற்றுவோரும், வறுமை, நோய், மற்றும் போர்க்களத்தில் சகித்துக் கொள்வோருமே நன்மை செய்பவர்கள். அவர்களே உண்மை கூறியவர்கள். அவர்களே (இறைவனை) அஞ்சுபவர்கள்.
திருக்குர் ஆன் 2:177
பிற மதத்தவர்கள் என்பதற்காக அவர்களை ஏமாற்றுவது யூதர்களின் கெட்ட குணமாகும். யாராக இருந்தாலும் கொடுத்த உறுதி மொழியை நிறைவேற்ற வேண்டும் என அல்லாஹ் கீழ்க்காணும் வசனங்களில் கூறுகிறான்.
75. நம்பி, ஒரு குவியலையே ஒப்படைத்தால் உம்மிடம் திருப்பித் தருவோரும் வேதமுடையோரில் உள்ளனர். நீர் நம்பி ஒரு தங்கக் காசை ஒப்படைத்தால் நிலையாய் நின்றால் தவிர உம்மிடம் திருப்பித் தராதோரும் அவர்களில் உள்ளனர். “எழுதப்படிக்கத் தெரியாத சமுதாயத்தின் விஷயத்தில் எங்கள் மீது எந்தப் பாவமும் ஏற்படாது” என்று அவர்கள் கூறுவதே இதற்குக் காரணம். அல்லாஹ்வின் பெயரால் அறிந்து கொண்டே அவர்கள் பொய்யை இட்டுக் கட்டிக் கூறுகின்றனர்.
76. அவ்வாறில்லை! யார் தமது வாக்குறுதியை நிறைவேற்றி (இறைவனை) அஞ்சுகிறாரோ, அல்லாஹ் (தன்னை) அஞ்சுவோரை விரும்புகிறான்.
77. அல்லாஹ்விடம் செய்த உறுதிமொழியையும், தமது சத்தியங்களையும் அற்பமான விலைக்கு விற்றோருக்கு மறுமையில் எந்த நற்பேறும் இல்லை. கியாமத் நாளில் அவர்களுடன் அல்லாஹ் பேசவும் மாட்டான். அவர்களைப் பார்க்கவும் மாட்டான். அவர்களைத் தூய்மைப்படுத்தவும் மாட்டான். அவர்களுக்குத் துன்புறுத்தும் வேதனை உண்டு.
திருக்குர்ஆன் 3:75, 76, 77
102. அவர்களில் பெரும்பாலோரிடம் வாக்கை நிறைவேற்றுதல் இல்லை. அவர்களில் அதிகமானோரைக் குற்றம் புரிவோராகவே காண்கிறோம்.
திருக்குர்ஆன் 7:102
முஸ்லிம்களின் நற்பண்புகளைக் கூறும் போது வாக்கையும், ஒப்பந்தங்களையும் நிறைவேற்றுவதும் அவற்றில் ஒன்றாகும் என அல்லாஹ் கூறுகிறான்.
20. அவர்கள் அல்லாஹ்வின் உடன்படிக்கையை நிறைவேற்றுவார்கள். உடன்படிக்கையை முறிக்க மாட்டார்கள்.
திருக்குர்ஆன் 13:20
8. தமது அமானிதங்களையும், உடன்படிக்கையையும் அவர்கள் பேணுவார்கள்.
திருக்குர்ஆன் 23:8
32. அவர்கள் தமது அமானிதங்களையும், ஒப்பந்தத்தையும் பேணுவார்கள்.
திருக்குர்ஆன் 70:32
ஒப்பந்தங்கள் குறித்து மறுமையில் விசரிக்கப்படும் எனவும் அல்லாஹ் சொல்லிக் காட்டுகிறான்.
34. அனாதையின் சொத்தை அவர் பருவமடைவது வரை அழகிய முறையிலேயே தவிர நெருங்காதீர்கள்! வாக்கை நிறைவேற்றுங்கள்! வாக்கு விசாரிக்கப்படும்.
திருக்குர்ஆன் 17:34
எதிரிகளாக இருந்தாலும் அவர்களிடமும் நீதியாக நடக்க வேண்டும் எனவும் அல்லாஹ் வலியுறுத்துகிறான்.
58. அமானிதங்களை அதற்குரியோரிடம் ஒப்படைக்க வேண்டும் எனவும், மக்கள் மத்தியில் தீர்ப்பளிக்கும்போது நீதியாக நீங்கள் தீர்ப்பளிக்க வேண்டும் எனவும் அல்லாஹ் உங்களுக்குக் கட்டளையிடுகிறான். அல்லாஹ்வின் இந்த அறிவுரை உங்களுக்கு மிகவும் நல்லது. அல்லாஹ் செவியுறுபவனாகவும், பார்ப்பவனாகவும் இருக்கிறான்.
திருக்குர்ஆன் 4:58
8. நம்பிக்கை கொண்டோரே! அல்லாஹ்வுக்குக் கட்டுப்பட்டு, நீதிக்குச் சாட்சிகளாக ஆகி விடுங்கள்! ஒரு சமுதாயத்தின் மீதுள்ள பகை நீங்கள் நீதியாக நடக்காமலிருக்க, உங்களைத் தூண்ட வேண்டாம். நீதியாக நடங்கள்! அதுவே இறையச்சத்திற்கு நெருக்கமானது. அல்லாஹ்வை அஞ்சிக் கொள்ளுங்கள்! நீங்கள் செய்வதை அல்லாஹ் நன்கறிந்தவன்.
திருக்குர்ஆன் 5:8
152. அனாதையின் செல்வத்தை அவன் பருவமடையும் வரை அழகிய முறையில் தவிர நெருங்காதீர்கள்! அளவையும், நிறுவையையும் நேர்மையாக நிறைவேற்றுங்கள்! எவரையும் அவரது சக்திக்கு மேல் சிரமப்படுத்த மாட்டோம். உறவினராகவே இருந்தாலும் பேசும்போது நீதியையே பேசுங்கள்! அல்லாஹ்வின் ஒப்பந்தத்தை நிறைவேற்றுங்கள்! நீங்கள் படிப்பினை பெறுவதற்காக அவன் இதையே உங்களுக்கு வலியுறுத்துகிறான்.
திருக்குர்ஆன் 4:152
90. நீதியையும், நன்மையையும், உறவினருக்குக் கொடுப்பதையும் அல்லாஹ் கட்டளையிடுகிறான். வெட்கக்கேடானவற்றையும், தீமையையும், வரம்பு மீறுவதையும் உங்களுக்குத் தடுக்கிறான். நீங்கள் நல்லுணர்வு பெறுவதற்காக உங்களுக்கு அறிவுரை கூறுகிறான்.
91. நீங்கள் ஒப்பந்தம் செய்தால் அல்லாஹ்வின் ஒப்பந்தத்தை நிறைவேற்றுங்கள்! உங்கள் மீது அல்லாஹ்வைப் பொறுப்பாளனாக்கி, சத்தியங்களை உறுதிப்படுத்திய பின் அதை முறித்து விடாதீர்கள்!64 நீங்கள் செய்பவற்றை அல்லாஹ் அறிவான்.
திருக்குர்ஆன் 16:90, 91
இஸ்லாம் மார்க்கத்தை மற்றவர்களிடமும் கொண்டு சேர்க்கும் கடமை ஒவ்வொரு முஸ்லிமுக்கும் உண்டு. அடைக்கலம் கொடுத்த நாட்டுக்கே முஸ்லிம்கள் விசுவாசமாக இருக்கமாட்டார்கள் என்ற எண்ணம் மற்றவர்களுக்கு ஏற்பட்டால் அவர்களுக்கு இஸ்லாம் மீதும் வெறுப்பு ஏற்படும். இதை உணர்ந்து முஸ்லிம்கள் எங்கே இருந்தாலும் நீதிக்கும் நேர்மைக்கும் சாட்சிகளாக வாழ வேண்டும்.
